【on.cc東網專訊】 著名特技大師羅禮賢入行接近卅年，為超過二百多部電影擔任過飛車、爆破、火燒人等特技指導，合作過的巨星、名人無數，當中包括成龍、甄子丹、姜文、張藝謀、米高比爾等，在羅禮賢眼中，這批巨星、名導演都有一個共同點，就是對電影的專注，羅禮賢表示：「佢哋都係好喜歡電影嘅人，拍戲會非常專注，而他們每個人都有不同嘅電影特質，係好容易睇得出，好簡單成龍同甄子丹都係武打巨星，但佢哋打出嚟嘅功夫風格好唔同，而洪金寶同成龍同係于占元徒弟，佢哋嘅武打風格起初係相近，但去到《警察故事》之後，就已經開始有分支，每一個藝人都有佢自己嘅signature。」

《警察故事III之超級警察》、《霹靂火》連場飛車爆破，《金陵十三釵》炮火連天的打仗場面，《變形金剛４》（Transformers:Age of Extinction）激烈飛車追逐，跑勻香港九龍，一幕又一幕驚險刺激的特技場面，其實都是由羅禮賢作幕後主腦，他為了一部電影，更會自製一些用具，如拍攝甄子丹的《特殊身份》，便有一些特別設計只供該電影拍攝用之特殊用具，連外國工作人員看後都大讚香港「土炮」簡單實用，而之前《變形金剛４》（Transformers:Age of Extinction）在香港拍，羅禮賢跟導演米高比爾（Michael Bay)合作，米高比爾亦對羅禮賢有讚無彈，羅禮賢表示：「米高比爾要求好高，喺片場有時會忟忟哋，但大家合作過之後，佢向身邊工員作人員讚我，佢哋話導演極少讚人。」

source:

http://hk.on.cc/hk/bkn/cnt/entertainment/20140502/bkn-20140502050858305-0502_00862_001.html